Burma Memoirs: வெளியீட்டு விழாக்கள், ஹாங்காங்

ஹாங்காங்கில் “எனது பர்மா குறிப்புகள்” வெளியீட்டு விழா

காழி அலாவுதீன்

செ முஹம்மது யூனூஸ் அவர்களின் “எனது பர்மா குறிப்புகள்” நூலின் ஹாங்காங் வெளியீட்டு விழா சனிக்கிழமை, 20 பிப்ரவரி 2010 அன்று நடைபெற்றது. ஹாங்காங் இந்திய முஸ்லிம் சங்கம், தமிழ்ப் பண்பாட்டுக் கழகம், ஹாங்காங்கில் தமிழ் வகுப்புகள் நடத்தி வரும் இளம் இந்திய நண்பர்கள் குழு மற்றும் இலக்கிய வட்டம் ஆகிய அமைப்புகள் இணைந்து நடத்திய இந்த விழா, யூனூஸ் அவர்களின் பாராட்டு விழாவாகவும் அமைந்தது.

ஹாங்காங்கின் பிப்ரவரிக் குளிரைப் பொருட்படுத்தாமல் வந்திருந்த 350க்கும் மேற்பட்ட அன்பர்களால் அரங்கு நிரம்பியிருந்தது. யூனூஸ் பாய் தன் அன்பாலும் பண்பாலும் அவர்கள் மனதில் இடம் பெற்றிருப்பதை உணர முடிந்தது. அன்பர்களின் வாழ்த்துக்களையும் பாராட்டுக்களையும் தொடர்ந்து ப குருநாதன் மற்றும் நளினி ராஜேந்திரன் ஆகியோர் நூலின் சிறப்புகளைக் குறித்துப் பேசினார்கள்.

மு இராமனாதன் இப்படியான நூலுக்குத் தமிழில் முன்மாதிரி உள்ளதா என்று தனக்குத் தெரியவில்லை என்றார். இதில் ஒரு காலகட்டத்தின் வரலாறு, சமூகம், கலை, இலக்கியம், சமயம் என்று பலவும், சமூக அக்கறை மிகுந்த ஒரு தனிமனிதரின் பார்வை வழியாக விரிகிறது என்றார். நூலின் உள்ளடக்கத்தைப் போலவே இது உருவாக்கப்பட்ட முறையும் புதுமையானது என்றார். யூனூஸ் பாயின் நேர்காணல்களை இலக்கக் கோப்புகளாகப் பதிவு செய்து, தான் அவற்றை நண்பர்களுக்குப் பகிர்ந்தளித்ததையும், நண்பர்கள் அவற்றைக் கேட்டு, கூகிள் ஆவணங்களில் தட்டச்சு செய்ததையும், பிறப்பாடு இவை இயல் வாரியாகத் தொகுக்கப்பட்டு எடிட் செய்யப்பட்டதையும் விளக்கினார்.

நூலை வெளியிட்ட ஹாங்காங் இந்தியத் தூதர் மாண்புமிகு எல்.டி. ரால்டே, இந்த அரிய நூலை ஆங்கிலத்தில் பெயர்க்க வேண்டுமென்றார். யூனூஸ் பாய் ஹாங்காங்கைப் பற்றிய தமது அனுபவங்களையும் நூலாக எழுதி வெளியிட வேண்டுமென்றும் கேட்டுக் கொண்டார்.

நூலைப் பெற்றுக் கொண்டு சிறப்புரை ஆற்றிய பேராசிரியர் சுப வீரபாண்டியன் இணையத்தை வெகு சிறப்பாகப் பயன்படுத்தியமையும் ஒரு குழுவாக இயங்கி நூலை உருவாக்கிய முறையும் புதுமையானது என்று பாராட்டினார். இந்த நூல் புனைவற்றவை(non fiction) என்ற வகையிலேயே வரும், என்றாலும் ஒரு புனைவைப் போல சுவையாகச் சொல்லப்பட்டிருக்கிறது என்றார். நூலில் உள்ள பல பதிவுகள் வேறெங்கும் வாசிக்கக் கிடைக்காதவை, இந்த நூல் தமிழ்ச் சமூகத்திற்கு யூனூஸ் பாய் வழங்கும் கொடை என்று பாராட்டினார். நூலில் இருந்து பல மேற்கோள்களைச் சுட்டிக் காட்டி யூனூஸ் பாயின் நினைவாற்றலையும், தன்னடக்கத்தையும் போற்றினார். நூலில் உள்ள இரண்டொரு தவறுகளைச் சுட்டிக் காட்டவும் அவர் தவறவில்லை

மாண்புமிகு எல். டி. ரால்டே, ஹாங்காங் இந்தியத் தூதர் நூலை வெளியிட பேராசிரியர்.சுப வீரபாண்டியன் முதல் பிரதியைப் பெற்றுக் கொள்கிறார். இடது புறம் செ. முஹம்மது யூனூஸ், வலதுபுறம் நூலின் தொகுப்பாசிரியர் மு இராமனாதன் (மேலதிகப் படங்களுக்கு: http://picasaweb.google.com/yoonusbhai.function/HongKongBookLaunch?feat=directlink)

யூனூஸ் பாய் யாவர்க்கும் நன்றி கூறினார். இந்த நூலைப் படித்தவர்கள் சொல்லும் பாராட்டுரைகள் தனக்கு மகிழ்ச்சியளிக்கிறது என்றும், நண்பர்களின் ஒத்துழைப்பு இருந்தால் அடுத்த நூலையும் எழுதலாம் என்றார்.

கவிதா குமார் மற்றும் ஆர்.அலமேலு ஆகியோர் நிகழ்ச்சியைத் தொகுத்து வழங்கினர்.

kazhi.mms@gmail.com

நன்றி: திண்ணை.காம், ஆகஸ்ட் 14, 2010

%d bloggers like this: